Sobrang Payat Ko Kasi

Sa huling araw nang grupo naming magkakasama sa kolehiyo, napag-usapan namin ang mata ko;

AKO: Idescribe nyo nga yung mata ko. Bilugan o singkit?

LALLAINE: Uhm…

KRISTEL: Tumawag na naman kamo sakin yung boyfriend ko. Kanina sa Smart. Ngayon sa Globe. Kita mo mamaya Sun na yung gamit nya.

AKO: Ikaw, ano sa tingin mo?

HANZEL: Singkit eh.

LESLIE: Bilog.

LOREN: Medyo bilog nga.

AKO: Sabi nila parang daw lagi akong inaantok.

MELANIE: Mapungay kasi.

AKO: P’ano ba yung mapungay?

MELANIE: Yung ganito o. (Nagbeautiful eyes)

AKO: Hindi naman maganda yung mata ko. Mapula-pula nga eh

ANGELO: Bilasa.

LAHAT SILA: Oo nga. Bilasa.

Karaniwan sa mga Hyperthyroid na tao ang pagluwa ng mata na kilala sa terminong medikal bilang exophthalmos. Pero hindi naman lahat. May kakilala ako na singkit nung ipinanganak tapos nagkaroon sya ng Hyperthyroidism pero singkit pa rin. Kaya naman kahit bilasa daw yung mga mata ko, naghihinala pa rin ako na may hyperthyroidism ako dahil sa ilang bagay;

1. Sobrang babang timbang:

Maaring meron akong eating disorder. May mga pagkakataong nawawalan ako ng gana sa pagkain anupat hindi ako kumakain ng pananghalia’t hapunan. Subalit makalipas ang ilang araw ay nagkakaroon ako ng binge eating episodes at sobra sobra naman ang kinakain ko, subalit isa itong balintuna sa aking pangangayayat, sapagkat ang binge eating ay mas nagpapataba pa nga sa isang tao (Tulad sa kaso ng may mga bulimia nervosa).Pumasok din sa isip ko ang mga bulate. Kaya nga uminom ako ng pampapurga noong Mayo, pero wala ring nangyari at lumabas. Kaya nga napag-isipan ko na maaring Hormones ang may kasalan sa bumababa kong timbang.

2. Mabilis akong magutom:

Gutom na ako makalipas lamang ang 2 oras. Kaya nga at maya’t-maya ang ang kain ko. Kaya kong umubos ng isang litro ng softdrink sa isang upuan. Naisip ko tuloy na maaring napakabilis ng pagposeso ng katawan ko ng pagkain, lalo na nang Carbohydrates.

3. Hindi ko natatagalan ang init:

Naikwento ko na minsan nang patayin ang Air-condition sa Operating Room. Sa sobrang init kamuntik na akong mahimatay. Hindi lang iisang beses nangyari ito sa akin.

Ang lahat ng ito ay sintomas ng Hyperthyroidism kaya minabuti ko kaninang pumunta sa isang malapit na laboratoryo upang magpaanalisa ng dugo. Itetext na lang daw ako paglumabas na yung resulta.